نشيد التربية

40 تلميذ في القِسم * الشكوى لربي من ها القَسم
لكراسي ماهيش موجودة * الفلوس سرقتها قرودة
بوبالة فاضت بالزّبلة * وينو اللّي ينفض الغبرة
طباشير عبّالي صدري * مرّضني كانك ما تدري
دم وسكر فتكوا بينا * والأعصاب زادت علينا
الجّلطة تفجعنا بيها * رحمة ربي على ضحاياها
بوصفير دار في مدارسنا * مرض قديم في بالنا كنِسنا
لمبيتات بكلها تعاني * بنية قديمة يا وخياني
مطاعم تنقصها نظافة * وانت تحكي عالثّقافة
مخابر بالإسم تنادي * جهزوني أنتم يا أولادي
الأنترنات فكرون يددِّش * كان توجدت خدّي نخبّش
المــكــيّــف نسمع بيه * المسؤول أولى بيه
نسهر نحضّر ليالي * درسي ديما في العلالي
عُطلتنا حسدونا عليها * راحتنا والله ما فيها
نظري ضعف من التّصليح * نحّي غالط حط صحيح
المربّي قدره عالي * في التأجير يبقى لتالي
كذبوا علينا في الشهريّة * قالوا كلت الميزانيّة
صبوا وإلا ما صبّوش * فضحونا ما بين العروش
فضحونا على زوز فرنك * ما يصدقهم كان الدّنــك
لا عنّا لا بونوات   *   لا وتلة لا امتيازات
شهريّة تمشي على بكري * بركة ربي ديما تسري
المربّي أهــانــتــوه * بالإعلام شوّهتوه
نبقى ديما شمعة تضوي * صوتي عالي ديما يدوي
كلمة الحق نقولوها * غصبا عنكم تسمعوها
بالنضال حقّي يجيني * نقابة معايا تحميني
نختم كلامي بنصيحة * تبرأ بلادي راهي جريحة
سيدي على راسي وعيني * يحمي تونس ويربيني

كلمات : أحمد بوعوني
ألحان : العائلة الكل تتعلم في الموسيقى باش تغادر التربية
كورال : بشرى ومحمد وياسين بوعوني
11/12/2018